طيف كلام ..

بقالي فترة مكتبتش
مع ان الفترة اللي فاتت حستها أكتر فترة
محتاجة أوي أطلع اللي جوايا فيها
.
بس بعكس كل الظروف
التطور التكنولوجي اللي احنا فيه
هو اللي منعني أكتب 😂😂
.
بس حاسة ان الأيام دي
ممكن تكون أيام فترة في الحياة
و عايزة أقرأ عنها بعدين
.
.
من اسبوعين ..
حسيت انها أكتر مرة ممكن أكتئب فيها
مع الوقت لاقتني بهدى شوية
أتعصب شوية
ساعات بلاقي اللي أطلع غضبي فييه
و كتير مبلاقيش
.
مشاكل كتير شوفتها في حياتي
ساعات أكون طرف فيها
و ساعات مجرد رأي استشاري !
لكن أول مرة أشوف في نفس التوقيت
مشاكل من كل الأنواع !!
.
يمكن أول مرة
أحس إحساس العجز بالصورة دي !
يمكن مش عجز
يمكن تجمد
او يمكن مسلوبة الإرادة !
.
زمان كنت فاكرة
انك تعيش مبسوط في ظروف مترتبة لكن مريحاك
و الأهم انها مكنتش اختيارك
حاجة حلوة جدا و نعمة كبيرة من ربنا
.
بس مستوعبتش الدنيا بالصورة دي
صورة ال ولا حاجة اللي مالية كل جزء فيا
.
تحصل حاجات حلوة
قادرة انها تفرح اوي
لكن كل شوية الفرحة بتتسرق
لأسباب غريبة و الأدهى إنها دايما مش بإيد حد !
.
غبت عن كل حاجة
غبت عن كل مكان
اختفيت حتي من نفسي
او يمكن نفسي اللي اختفت من زمان
و يدوب لسه أخده بالي !
.
مش عارفة ايه الصح من الغلط !
حاسة ان كل حاجة ملخبطة
مفيش أي قرار واضح
و لا بقيت أشوف أي فعل يتعملي
عشان أحدد أي رد فعل صح و مندمش عليه !
حاسة اني ندمانة اني بفكر !
ندمانة أكتر لو سحبت ايدي و مفكرتش !!
.
حاسة اني شبه ورقة الشجر
شوية بتطير بشوية هوا
من غير إرادة عايزة تروح فين
شوية تقع في طينة
شوية عصفورة تعضعض فيها !!
و تكمل طيران في الهوا و حتة منها ناقصة !
.
إحساس غريب أوي
مفيش حاجة قادرة تخرجني من الدوامة المقفولة دي !
.
يا ترى مقابلتي ل ربنا قربت ؟؟
كل ما بحاول أستوعب
بحس بخوف و رعشة غريبة اوي
يمكن يحصل في أي وقت
بقيت بتخيله بيحصل في أي حاجة أعملها
نفسي أووووووي
أحس اني مطمنة للنهاية
مطمنة ان اللي بيحصلي دلوقتي هيخلص و يختفي
أول مرة أعيط و أنا بكتب هنا !
مع ان الحمدلله ربنا رزقني بنعم كتير
بس نفسي أحس اني مطمنة
اني بتكلم مع حد من غير حسابات و تُقل
نفسي أحس بأي حاجة حلوة و بسيطة و سلسة و تريح
نفسي أحس ان لو ربنا كاتبلي أعيش أكتر من دلوقتي
أعيش حاجة واحدة تفرحني من غير ما احسها ناقصة او👇👇 بتتسرق مني
#يارب
ارحمني في دنيتك و هون عليا أخرتك يا ألطف الراحمين  يارب 🙏

خاطرة من أحدهم 👇🏼..

مع الوقت اتعلمت ان صاحبتي اللي فرحتلها جدا والأرض مكتش سايعاني وقت نجاحها أو خطوبتها أو حلم من أحلامها حققته مش هتفرحلي بنفس الدرجة لما أبقى أنا بنجح أو بتجوز أو بحقق أحلامي ، وهتشوف ده شيء عادي ميستاهلش الفرحة أوي يعني .

اتعلمت كمان ان صاحبتي اللي وقت وجعها كنت موجوعة عليها زيها ، والدنيا ملهاش طعم وملهاش معنى وهي تعبانة ، وهاين عليا أخد وجعها كله عشان الحمل يخف من عليها ، وقت تعبي هتعيش هي حياتها وهتشوف تعبي شيء ملهوش أهمية واني مكبراها ، وكله بيعدي . 

اتعلمت ان صاحبتي اللي كنت بشوفها أقرب ليا من اخواتي عمرها ما هتكون زي اخواتي ، وان عمرها ما هتحبني زي ما هما بيحبوني ، ولا هتخاف عليا زيهم .

اتعلمت ان أحلام المراهقة والصحاب اللي هنفضل طول عمرنا سوا وأزواجنا وعيالنا هيبقوا هما كمان صحاب عشان ميبعدوناش عن بعض دي مجرد أحلام بعيدة كل البعد عن الواقع ، واللي بيتحقق منها مجرد استثناء .

اتعلمت ان المسافات بتأثر ، والدنيا بتلهي ، والحب والصداقة مش أقوى من الأيام .

اتعلمت اني مستناش نفس ليفل الفرحة ف عيون اللي حواليا اللي كانوا هما بيشوفوه ف عينيا ليهم ، واني مستناش نفس الحجم والمساحة من الوقت والتفكير والمشاعر اللي كنت بديهالهم .

اتعلمت اني أفرح ليا عشان محدش هيفرحلي ، واني أشد ايديا من الوجع عشان محدش فاضي لحد ، واني متعشمش عشان العشم بيوجع والعتاب بيهد أكتر ما بيبني ، واني أحب بعقل ومحطش أحلامي كلها ف شخص عشان جايز جدا الشخص ده ميكونش قد أحلامي وهرجع أتعب وأعيط ومحدش هيسمعني حتى .

أنا اتعلمت اني أكون لوحدي من كتر ما اتعودت اني أكون لوحدي ❤

............

الكلام اللي فات ده كله

من أحد صُحابي

الحقيقة انا استغربت جدا التوقيت 

اللي كتبت فيه الكلام !

.

خايفة أعتبر كلامها حقيقة و إشارة من ربنا

و خايفة أتخم تاني و اقول كلامها فيه ظلم للناس

.

أنا فعلا نفسي اووووووي 

ألاقي اللي ينهي كل اللخبطة 

اللي ظهرت مرة واحدة 

#يارب 🙏🏼..

الإهمال 🤢

طول عمري بكرهه 

عمري ما شوفتله سبب يخليني 

احبه او حتى أقبله 

.

معرفش حاجات كتير عن نفسي 

لكن متأكدة جدا

ان الإهمال قوي لدرجة 

يقتل أي حاجة أشوفها حلوة

.

علي نقيض طبعي 

في حاجات كتير معنديش ليها طاقة صبر نهائي

منها .. الإهمال! ..

.

حاسة ان ضريبة الاهمال 

علي اي حد حوليا 

هينة و بسيطة اوي !

.

ازاي بني أدم يقدر يعيش في مكان 

في حاجة مقلوبة !

ولا ازاي يقدر يستحمل 

عينيه تقع علي حاجة متعرفهاش

.

ازاي يقدر يبص علي تليفونه حتي يلاقي كل الدنيا داخلة في بعض!

ازاي يقدر يحول اهتمامه المستمر 

لسؤال كل ما تحن الظروف علينا

و ان مجاش عادي برده 

.

كنت أسمع زمان ان الفرصة لما تجيلك 

اوعئ تفرط فيها ..

سمعت بعدها 

ان لو الفرصة مجتش 

لازم تخترعها بنفسك و تستغلها صح جدا

.

لكن دلوقتي بقي الناس بقت أوعى و أعقل طبعا

بقت تفضل مستنية في مكانها 

لحد ما الفرصة تيجي لحد عندها 

و اول ما تيجي يقولوا لا مش دي 

أكيد هيجي الأحسن منها 

و يوم بعد يوم 

بقينا تماثيل متكسرة متلصمة

هتقع بنفخة هوا 

ازاي بجد الدنيا دي بتمشي بتعرج كده !

ازاي :///

.

أنا الصراحة احساسي غريب اوي !

حاسة ان من كتر ما اتعصبت مبقتش فارق معايا!

و ده معصبني اكتر !!

.

عندي زهق من كل حاجة بتتحرك في الدنيا

كأني فقدت الثقة ان في اي حاجة في دينا دي 

تقدر تغير مزاجي ده! 

و عادي الحل هو التأقلم و بس 🙊..

.

كنت بقول عايزة امشي 

و ابعد جدا

دلوقتي حاسة ان مهما بعدت 

عمرها ما هتفرق !

.

حاسة ان جوايا ناااار باردة جدا!

مش فاهماها ولا عارفة اتعامل معاها 

ولا عارفة هتموتني من الحر ولا من البرد!😓

.

اي قرار دلوقتي مبقاش له أي لازمة

مدام كده كده علي يقين

ان بكلمتين كل حاجة هتخلص و أرجع فيه!

.

اللهم لا تحملنا ما لا طاقة لنا به 

يارب 🙏🏼🙏🏼🙏🏼

الحب من وجهة نظر 💚..

هل تعرف ما هو الحب برأيي ؟

أن ترى أحدهم و تقول ..

لا أستطيع أن أعيش بعد الأن دون أن أري هذا الانسان

الزواج أو الحب .. كله حكاية🙊..

هل تستطيع أن تعيش دون رؤيتها؟

هل تستطيع أن تقول لنفسك أنك تتنفس من دونها؟

لا تنظر من جانب الزواج و المسؤولية و العائلة و الأولاد و لماذا وضعت الجوارب هناك!🤢..

لننظر الي الحياة من جانب الحب قليلا

اننا محظوظون اننا نحب💘..

لا يحل هذا مع كثير من الناس

جانب العاشق حقا 💓..

هناك الكثير من لم يعيش أبدا🙊..

#عُمر_إبلكشي 🍃..

فرد 😄..

زمان و انا في ابتدائي كنت بنبهر جدا بلبس التخرج الأسود ده بحس انه يوم ما يتلبس يمكن أحس اننا عملنا حاجة تستاهل الواحد يفرح !..

في المدرسة وقتها كان الروب ده بيتلبس في التخرج من إعدادي و التخرج من ثانوي .. بعد ظروف حصلت وقتها نقلت مدرسة تانية في إعدادي كانت مجرد مرحلة عادية بالنسبة لهم و عرفت ان التخرج بيكون في مرحلة ثانوي بس .. حسيت كأن كل تتمني تلمس السما في لحظة لسبب ما ربنا يبعدها شوية اكتر او يقص حتة زيادة من رجلك كل شوية و تفضل تتمنى تطول لحظة عشان تنسى احساس العجز اللي اتحدف في الطريق الوحيد اللي عقلك قدر يختاره .. 

عديت إعدادي و مكنتش فترة حلوة اوي الصراحة و الحمدلله نقلت مدرسة تانية في ثانوي و كانت اجمل فترة في حياتي الحقيقة لحد دلوقتي علي الاقل مع اني للأسف في اخرها جبت ٩٦.٨٪ و كان تكريم التخرج و لبس الروب لكل اللي جاب وقتها ٩٧٪ و ما فوق 😂

كنت مقهورة جدا وقتها بس اللي هون عليا ان الحمدلله فترة ثانوي دي كانت الفترة تقريبا الوحيدة اللي حسيت انها فترة مثمرة و ان كل اللي يعمل حاجة ليها المقابل اللي يرضيك كانت المذاكرة مشجعة و صديقة عمري الوحيدة اللي بتثبتلي كل يوم ان الدنيا مش مكان للمصلحجية و بس 👌🏼..

و خلصت ثانوي من غير تخرج الحمدلله 😂..

جينا للجامعة اللي فعلا كانت أجهد فترة في عمري و أهبط أيام شوفتها ملهاش أي علاقة بقاعدة العمل عبادة .. شوفت ناس بتتعب كتير و مفيش مقابل و ناس بتشتري المقابل بالهوا ! القاعدة الوحيدة اللي عرفت اتعامل بيها في الفترة دي .. هي ان لكل قاعدة استثناء و كل حاجة كانت تقابلنا كانت الاستثناء 🙊..

بصراحة نسيت حلم الروب الأسود ده طول فترة الدراسة في الجامعة او مش عارفة اذا كان لسه فارق معايا ولا لا .. لحد ما جت اللحظات الاخيرة و جت حفلة التخرج الجامعي فجاة بلا سابق إنذار و اتلغت و مبتحددش معاد تاني .. افتكرت الحلم القديم و حاسة كأن ليا رجل اتقطعت مش مجرد قصيرة! .. تعبير غريب في فترة المفروض تكون أسعد أيام العُمر 🙊..

بعد ما اتحدد معاد تاني للحفلة .. افتكرت آية في كتاب ربنا من سورة الأحزاب بتقول " و بشر المؤمنين بأن لهم من الله فضلا كبيرا " .. سبحان الله علي كل حاجة حصلت و هتحصل .. 

متحمستش لأي حاجة هتحصل .. بقيت أحس كل حاجة روتين مكرر عمره ما هيتغير ١٪ .. حسيت اني اتخرجت بس النهاردة بعزومة بسيطة تفرح بجد .. يمكن أول مرة أحس بحاجة مفرحاني من شهور طويلة حاجة بعيدة عن الروتين و الكلام الخالي من اي دسم الحقيقة .. إبعدنا عنها يارب 😆🙏🏼..

#اللهم إنفعنا بما علمتنا و بارك لنا في ما اخترت لنا 🙏🏼

#الحمدلله 👏🏼

#بوح 🍃..

نفسي 😃..

أوقات بحس ان 👇🏼..

نفسي أرغي كتير اوي 

ساعات مع حد معين 

ساعات في حاجة معينة 

ساعات عني أنا ! 

.

أغلب الوقت بحس 

بأهميتي أقل كتير من حقيقتها عند غيري

بضايق .. بتعصب .. ببعد بتهور

.

نفسي ناس معينة 

بحب أتكلم فعلا معاهم 

محسش بتُقل منهم!

نفسي أحس ببساطة الدنيا .. بسببهم 🙊..

.

أوقات بحس اني نفسي 

أمتلك حاجة معينة 

مش مهم هي ايه

المهم ان انا اللي عملت كل ركن فيها

بنفسي 👌🏼..

.

بتمنى الحمل يخف من عليا شوية 

و برجع أزعل لما يحصل فعلا 

بصراحة .. نفسي أشيل كل الأحمال اللي في الدنيا

لكن مكنش لوحدي 🙊..

بفتكر جملة يسرا في مقدمة مسلسل خاص جدا

بفتكرها كتير و هي بتقول 

يابخت اللي عنده وَنَس حقيقي في حياته

وَنَس صريح و مريح ✨..

أعترف جدا ان الدنيا دمها تقيل اوي 

طول ما قررت تكون معزول فيها

عارفة ان الاجتماعيات بتهون كتير 

لكن يارب ما تكون الا علي حق و خير 🙏🏼..

.

نفسي جدا الفترة الجاية تعدي بخير و سلام عليا

.

نفسي مشوفش اي حد 

بيتعامل بنفاق و مصلحة مع الناس 

و متكونش التسلية رقم واحد في حياة حد 

.

نفسي أنام كل يوم و أنا مش مضايقة حد

ولا متضايقة من حد 🙏🏼..

.

نفسي جدا جدا جدا 

أطلع رحلة بحرية هادية مفهاش أي مشاكل

و أتفرج علي دلافين كتيييير 😍..

.

نفسي أتأكد فعلا ان المشكلة لما بتيجي 

ليها حل بسهولة من غير كلاكيع 😥..

.

نفسي أسوء أيام عمري تكون فاتت خلاص 👏🏼👏🏼..

.

نفسي أخس ٩ كيلو 😭😭..

.

نفسي ألمس حتة من السما ! 🙊..

كلمة مش مهمة قصاد المهم !

من زمان بتيجي في بالي 

خواطر مش مفهومة 

عن .. الأهمية ! 

.

هو صحيح الدنيا مش بتقف علي حد او علي حاجة

لو حقيقي .. معناها كل اللي فيها عايش ؟؟

يبقي ليه بحس في كل الوشوش 

انها أصوات متركبة علي أجسام !

مفهاش قلب ينبض 🙊..

.

بحس بلفظ "ملهاش قيمة" مش بيعنيها اوي

لكن لو حقيقي انها مش بتوقف 

و حقيقي ان الحي أبقى من الميت

يبقي احنا اللي عمرنا ما هنكون #حقيقة 🖤..

.

هتفضل الحقيقة و رغبة تطبيق الحلم للواقع 

جزء من خيالاتنا 

جزء من كُتبنا 

جزء من مفاهيمنا 

توسع دايرة نشاطنا و تزود ماديات كتير مننا 

و تبني سور العالم الافتراضي 

اللي دفنا نفسنا فيه طول العُمر ..

.

 السبت ١٢/٨/٢٠١٧

اخترت الموت في اليوم ده بكامل إرادتي 

في اللحظة دي مجاش في بالي الا حاجة واحدة

هو صحيح ممكن الواحد يموت و حياته فاضية كده!

ممكن حقيقي يسيب الدنيا و ينزل تحت الارض

و هو مش فارق مع اي حد 

عشان دايما دايما دايما البديل موجود ! 

.

#ربنا دايما بيقدم العوض 

و ده من رحمته بينا 

بس عوض ربنا هو الحقيقة 

اللي كنت بتصبر نفسك بغيرها لحد ما تستقبله

ازاي تتحول نظرتك من الأمنية المنتظرة 

لمجرد بديل او "الحي أبقى من الميت" 😶..

.

الوجع او الحزن

نقطة ضعف

حقها تبان في جزء من الحياة 

بس مش حقيقي وجودها طول الأيام اللي بتنفس فيها!

.

نقطة الضعف .. شيء مهم جدا 

موجودة عشان تفكرنا دايما بالحاجة اللي محتاجنها

و أحق بوقتنا ندور عليها 

.

اللي مستوعبتوش في اللحظة دي

ازاي البني أدم يعيش عمره كله 

بنفس نقطة الضعف في حياته؟؟

.

بقيت أخاف أدعي ربنا ينهي حياتي 

من كُتر ما حسيت قد ايه فارغة و مش فارقة مع حد او حاجة و بديلي دايما مستعد !

و بنفس الوقت مش قادرة أستحمل وجودي في الدنيا

المنفرة جدا جدا جدا جدا دي !!

.

بصراحة بستغرب جدا جدا جملة 

اننا شعب متدين بطبعه 

و متأكدة اني مش بستغربها لوحدي

لكن مش عارفة ليه ربط فجاة 

بين كل النفور اللي في الدنيا دلوقتي ببعدنا عن ربنا !!!

المشاعر المتضاربة دي فكرتني أوي 

بجملة قالها جمال الدين الأفغاني .. 

"أفضل وسيلة لإقناع الغربيين بالإسلام 

أن نقنعهم أولا بأننا لسنا مسلمون كما ينبغي"

.

اللهم لا تجعلنا من الغافلين عنك و ارزقنا حُسن إتباعك 🙏🏼🙏🏼..

.

يارب إبعد عنا أي حيرة يارب 

و ارزقنا خير القدر و اصرف عنا شر ما قضيت

يارب يارب ما تحوجنا لأي مخلوق علي وجه الارض

.

أنا نفسي ألعب في الملاهي دايما 

و أفضل بعيد عن دوشة و هرجلة و كدب و رجعية و قسوة قلب الدنيا لما تفتكر اننا كبرنا خلاص ✍🏼..

.

زي ما قال ابن القيم ..

"القلب كلما اشتدت بِه الغفلة اشتدت به القسوة

 فإذا ذكر الله تعالى ذابت تلك القسوة 

فصار طيبا مطمئنا 

و عاد راضيا مرضيا" ..

.

كأن #ربنا بيرزقنا الفرصة اللي تخليك تحس انك شبه العايشين في حاجة 👇🏼..