عشوائية !

رقيتك من عيون الناس ..
و من كل القلوب حواليك ..
و من كل اللى قابلك يوم ..
و بات يحلم برمش عينيك ..
و من كل اللى شايفينك ..
و من كل اللى عارفينك ..
و م اللى سلامُه بيطوِّل ..
عشان يفضل ف حضن ايديك ..
و بخرتك من العاشقين ..
و من أشواق حروف دايبين ..
و م اللايمين ..
و مني .. 

رحمة الله تسكن قلوب

كانت أكتر زيارة نحسها قصيرة !
كان ممكن أطول حد نقعد في بيته
لكن دايما كان الوقت يعدي في لحظة !
كنت بستنى اسمه يظهر علي تليفوني

من حوالي 4 سنين كنا بنزوره في بيته ..
عادي كنت متعودة عليه بيقلب علي الكمبيوتر
بس كانت أول مرة يكون عندي فضول أعرف بيعمل ايه ؟؟!
سألته يومها .. قالي انه بيجمع القرآن
عشان لما يموت تكون صدقه جارية علي روحه :(
مجاش في بالي أي حاجة أقولها الا بعد الشر عليك يا عمو :((
قالي هو حد ضامن عمره يابنتي

سكت ساعتها .. كان نفسي أقوله ساعتها هو ليه بتقول كده ؟؟؟
ليه عايز تمشي !؟ كان نفسي أمشي أنا وقتها !

أول مرة أقول اني مكنتش بحس بفرق في السن بيني و بينه !

متعودة عادي ان زيارتنا ليه كانت بتكون كل فترات طويلة
لكن مهما طالت المدة لازم هتيجي الزيارة

بصراحة حاسة لسه اني مستنياها ! :)
و مفيش بصراحة أحسن من أمل نفضل عايشيين عليه
هيتحقق أكيد ^_^

دنيا مش جنة

ناس كتير بتقول ..
يابخت مين بات مظلوم و ما بات ظالم !

لما فكرت في الجملة دي من سنين طويلة
قولت عندهم حق .. أهم حاجة عيني متغمضش و حد سهران يدعي عليا
و قولت مع الناس يا بخت من بات مظلوم و ما بات ظالم !

و لفت الأيام و دارت
شوفنا ليالي ظلم كتير
بس اتربينا اننا نسكت و منتكلمش
و نكتفي ب حسنا الله و نعمة الوكيل

بس بجد تعبت ..
عمري ما جربت إحساس الظالم
ليه أجرب المظلوم !
صعبة أوي .. تفكر في الشيء ده بكل طاقتك و يكون عقبة في طريقك
سد طويل أوووي !!

المظلوم .. إنسان غلط في وقت غلط !
كبرنا و لما اتكلمنا .. ظهر الكلام كأنه دخان سجارة بتهشه !
مش فارق مع حد و شاغل دماغ حد

في وقت من الأوقات إفتكرت ان الدنيا دي جنة بس جزء مصغر منها مش عارفة ليه 
كان بيتهيألي ان الغلطة اللي حد يعملها ليها ألف طريقة تتصلح و تتنسى
لكن مش أي حد ممكن نسامحه !

زي ما قالوا زمان الضربة لو جت من القريب تموت
ياريت الحياة كانت خلصت قبل ما تبتدي !

هنفضل رايحين جايين .. كالسراب !
و بنقول في سيرنا حسبنا الله و نعمة الوكيل 

صحيح أصلها دنيا فانية مش جنة ...
أول ما اتولدنا كنا ملايكة ..
لو كنا موتنا أطفال كانالحياة اتغيرت أوي
لو كل ظالم قبل أي حاجة يعملها توفي
بدل تعب أهله عليه كانوا دخلوا الجنة بسببه !

طبعا حرام تمني الموت !
لكن ..
مش دايما هنعرف نعيش كصدى صوت
استبن !!!

رسمة وسط حدود بايشة
بقت شوية مياه تفتفتها !!
ليه ؟؟
ليه بينستقوي بس علي اللي متأكدين انه أضعف مخلوق !!
ليه بنكبر نعقل و ننسى اعتبارات كتير !
ليه في اللي بيستغل الطيبة و الفضل .. أنبل الصفات عشان يخفي بسمة ورا القطبان !!

يالله
دنيا زائلة ! 

اذكريني 💗

أجمل حاجة في الحياة
إن سبب سعادتك الحقيقي يكون جواك
و لما يمشي .. القدر ما يحرمك من بذرة صغيرة تفضل معاك

سبحان الله
كل إنسان جواه جزء بيموت !
و جزء عمره ما يموت
و ان دفنته الأيام و السنين
بيكون إحساس غريب طوته مقدمة كتابك ! :) 

صح في نظري غلطة .. صح او غلط مش عايزاها

و يمكن من الغلطات اللي بنعملها و احنا مش حاسيين 

اننا بنفرح بسرعة بعد ما الحزن أكل اللي أكله من روحنا

دنيا وحشة أوي فعلا !!

بس فيها مشاعر حلوة صعب تخبيها 

الغريبة بقي ان مشاعر زي دي تكون عائق في وشك !!

زي حد بيحبك و شايفك مضايق 

و يحاول يخرجك من حاجة زي دي 

بصراحة حد يحترم اوي بس .. 

بس في حاجات مش بيداويها الا الوقت 

عشانه بيكون حد مهم و تعبه مش هيفرحني

نفسي ترتاح نفسه 

نفسي ...

نفسي أعيش لوحدي 

بدون ما حد يشتاقلي 

او بدون ما يكون في حياتي حد يستاهل يقلق عليا 

مش هقول نفسي أعيش في حالي لان مش حاسة ان حالي يستاهل !! 

نفسي ... الستارة تنزل 

#يارب ثبت قلبي علي دينك 

مش فارق

خنقة غريبة !!

بفكر أهرب .. أهرب و خلاص 

علي فين .. معرفش 

المهم أمشي من هنا 

سبحان الله 

وقت تحس ان حياتك مهمة اوووي

و وقت تاني تحس انك عادي 

عادي اووي حتي لو اختفيت فجأة 

بدون إنذار .. ملكش اختيار 

الدنيا دي غريبة اوي 

تسعدنا اوووي و حياتك تستقر 

عشان تثبت فكرة .. الهدوء قبل العاصفة ! 😓

ممكن مش كبيرة اوي 

او مش كبيرة اصلا 

بس حاسة اني عديت ال٣٠ سنة 

في أيام تتعد علي الصوابع !!

هو أكيد في سبب 

عشان نفضل عايشين لحد دلوقت

بس مين أصلا اللي حاسس ان حواليه ناس لسه عايشة !!

كلام يائس أوي 

بس مش حاسة انه فارق مع حد ! 

ولا حتي فارق معايا انا شخصيا 

مرة حد قالي 

ان لما أكون متضايقة بدون سبب 

بيكون عشان في حد يهمني متضايق 

و اني يشاركه حزنه بدون ادراك مني 

بس هو لو كان في حد كده 

مش بيظهر ليه !! 

مش بيسبني في حالي و خلاص ليه 😞😞

مش فارق برده 😣