مشهد عشوائي لطبيب قلب 👇🏼

•• انت مين ؟

>> انا مين ؟ انا مين !

مش عارف ، سؤال صعب أوي 

يمكن عشان عمري ما فكرت أسأله لنفسي و يمكن عشان عنيكي بتربكني ...

عينيكي فيها لمعة غريبة أوي .. عاملة زي نور الشمس مقدرش أبصله كتير و مقدرش أستغنى عنه ✨!

•• أنا .. أنا أقصد انك تكلمني عن نفسك !؟ 

>> أكلمك عن نفسي إزاي و أنا تايه فيكي انتي!

أجيب منين جرأة عشان أشرحلك حياتي و شخصيتي و أفكلك الألغاز اللي محيراكي فيا و انا بحسس علي كل كلمة أنطقها قدامك 🙊..

أي طريق بيوصلني ليكي بمشيه علي طراطيف صوابعي .. مقدرش أخاطر بالمجازفة دي لإني حريص أوي أووي .. علي الخيط الضعيف اللي رابطني بيكي 💚..

مقدرش 💔.. 

صور شفافة ..

في فيلم .. كود ٣٦ 

لفتت نظري جملة قالها مصطفى شعبان

لما إتسأل عن صور العائلة الجماعية المتعلقة

قال " كانوا دايما يحبوا يتصورا مع بعض كده 

تقريبا عشان يحسوا بالعزوة " ..

.

جه في بالي فجاءه 👇🏼

الأعداد اللي بقينا بنتصور بيها دلوقتي !

زمان مكنوش بيتصورا كتير 

لكن كانت صورهم القليلة دي بتعيش 

بتعيش كتير أوي 

لدرجة انها وصلتلنا احنا بعدها بجيلين و أكتر !

.

بسأل نفسي كتير 

هي صدفة إن جيلنا هو اللي عايش وقت صعب؟

ولا صدفة إننا مش بنقدر نحافظ علي بعض ؟ 

ولا صدفة بنعمل مليون حاجة في اليوم أكتر من الأجيال اللي فاتت لكن بعكسهم بنحس يومنا فاضي من غير هدف الإ قليل أوي ؟ 

معقول صدفة إحساس التوهان اللي خلى الكل في وقتنا ده يتمنوا يفضلوا مع بعض و يتصوروا مع بعض و ينسوا كل حاجة و الصور تضيع مع غيرها كتير ؟ 

.

بحس إن إختراع الكاميرا 

كان زمان حاجة موثقة جدا

لكن دلوقتي فيها حاجة ناقصة 

زي ما تكون شفافة ! 

صورها بيضة 

مفهاش مشاعر تتوافق مع معالم الوشوش 🙊

.

حاسة إني بقيت أشوف الحاجات

أعمق من اللازم بكتير 🤣😭

#تفاصيل 🍃..

اقتباس من " خاص جدا " 🍃..

محدش في الدنيا ينفع يعيش لوحده

مهما حاول يعمل قوي و مستغني

الحاجة الوحيدة اللي منقدرش نستغنى عنها في حياتنا هي الناس .. الوَنَس ✨

يابخت اللي عنده وَنَس في حياته

وَنَس حقيقي مخلص 💚.. صريح و مريح 💛..

وجود الونس ده بيخلينا 

نعدي أي مشكلة و نتحمّل أي هم

لأنه بيفكر معانا إزاي نحل المشكلة دي 

و بيشاركنا في شيل الهم

مهما كان الهم ده خاص جدا🙊..

اللسان ممكن يتحرك ..

أسوء حاجة بتحصل دلوقتي 

إن (أغلب) الناس بتقول الجملة دي 👇🏼

" أنا مش محتاج أقولك عشان أثبتلك اهتمامي"

.

عقلي مش قادر يستوعب 

المعدل الفظيع اللي بقت الجملة دي بتتقال بيه!

معقولة كل الناس مش محتاجة تقول !؟؟؟

اومال ربنا ليه مخلقناش منتكلمش ؟!

.

ازاي كل موقف حد بيقول فيه الجملة دي 

مش مستوعب قد ايه اللي قدّامه 

حاسس بحاجة ناقصة بينهم 😶..

.

حتي الأطفال الصغيرين 

وقت ما يحسوا بإهمال أهلهم ليهم 

يبدأوا يدوروا عليه بره 

سواء صحاب او جيران او حب مش مناسب!

مع ان حب الأهل ده غريزة في الكل 

لكن لازم لازم لازم >> التعبير 💛..

.

حاسة ان مجرد ان أقول الكلام ده غلط مني!

استغربت جدا لما حد علق قبل كده علي الكلام ده

و قال انها سطحية !😕..

أي سطحية اللي ترسم حياتك كلها علي برواز فاضي

.

الجميع بلا أي إستثناء بقي عنده مشاكل نفسية 

بس الحرام الحقيقي و اللي كلنا محاسبين عليه

هو التفريط في أبسط الأشياء 

اللي ممكن ترجعلك إحساسك بالحياة من تاني 🌸..

.

يارب ارضينا و إرضى عنا 🙏🏼

يارب ما تبعد بينا و بين أي حد بنحبه 💚..

#اللهم إني إستودعتك كل ما أحب 💛

اللهم سُر خاطرنا و إبعدنا عن نقمة الوحدة 🙏🏼

يارب ارزقنا الحكمة و حُسن التصرف في دنيانا و حُسن الظن بلقائك في أخرتنا 👏🏼✨