جملة سمعتها كتير
مش عارفة ليه بتفكرني بجملة تانية
" اللي عايز شيء لازم يعمل عشانه مجهود "
.
بصدق حقيقة بذل المجهود عشان تمتلك شيء
و مجهود مضاعف عشان تحافظ عليه ..
.
بس
" الانتظار كمان قاتل "
انتظار رد فعل معين ممكن حقيقي ينهي كل حاجة
انتظار المجهود بطريقة معينة ممكن يموت !
.
اللي بيصعب الدنيا كلها في اغلب المواقف
هي الحيرة ..
الحيرة بين الانتظار لحد رؤية المرغوب
و بين البُعد
عشان اكتشفت انك كنت منتظر في محطة غلط
.
مش عارفة حاجة !
كل حاجة بقت محيرة جدا !
كل حاجة بقت تحمل مليون معنى و معنى
و مفيش اي حد علي علم بإيه المفروض ...
.
بصراحة .. في اللحظة اللي انا فيها دي
حاسة اني مش موجودة !
و كل وسائل اتصالي مع المحيط بيا
مش موجودة !
فاقدة الاحساس تماما بالفرق بين
الوهم و الحقيقة !
كل يوم حدث جديد و كابوس أغمض و أبشع
و مش عارفة نهاية ده كله ايه و فين !!؟
.
نفسي أتأكد من الصح و الغلط
اللي مؤمنة بيهم
نفسي مقعش دايما في دايرة خلاف
بسبب أقاويل الناس
.
الناس فعلا بتعرف تأذي كويس اوي
حتي و هي مش قاصدة
مع انها بتحبك ..
لكن عمرها ما فكرت ازاي تحبك بطريقتك 😓..
لكن الفكر دايما بيكون في طرف واحد
و نصيبها منك و تحاسبك لو جيت عليها ١٪
و في كل الأحوال الحب بينكوا مش بيشفع
عشانه عمره ما بيكون صادق
بمقاييس الصح و الغلط للناحيتين
دايما بيكون في الجانب اللي بيكتم
عشان الاخر يكبر .. من غير ما يبص وراه
عشان يكبر اكتر و يتمرد اكتر
و تثبت في مفاهيمه
ان هو ده التضحية في الحب !
.
مع اني كنت افهم
ان الحب بجد بأنواعه مفهوش انانية 👌🏼..
.
هو بس ممكن يمر أحيانا بأزمة
يحتاج حد يتحمل شوية و التاني يسند بنفس الوقت
و تمشي المركب بسلام
من غير ما يكون ليها رئيسين 🙊..
.
مش عارفة ليه بقيت بشوف
كل معاني الحاجات الحلوة في جيلنا .. محرّفة !!
احنا ليه ضُعاف أوي لدرجة تخلينا
نسمح نتغير بإيدينا للأسوء بحجة 👇🏼..
be cool !
حاسة ان حاجات كتير اوووي بقت باردة جدا
اكتر من اللازم بمراحل !
.
أول ما بحس بحاجة بتريحني
بصدق نفسي ان الواحد عمره لا تعب ولا هيتعب تاني
بس تقريبا بحسد نفسي بمجرد ما الفكرة تجيلي !
.
بسأل نفسي كل يوم
يا ترى كل حد فينا .. قدرات تحمله
هتخليه يوصل لحد فين ؟؟
